第一次，在賭枱上有咁強烈的感覺... 

其實我係做左ｄ好衰既野：我竟然在考試期間，去左澳門"Relax"！最離譜係，去埋賭場賭錢，玩廿一點。以前楂住一兩百放落去賭枱度，都手震震，但呢兩日豪到眼都唔眨下！

首先，去完漁人碼頭嘆完buffy，見就腳去左"金莎骨"，走返兩轉。唉，點知被掠去一千文，興興地，飛的去新口岸整返兩支Budweiser洩憤，然後一鼓作氣，殺落"新蒲撻"！哈，竟然俾我埋返個本！果然係"蒲撻"好吃ｄ...

好，第二日，瞓完一晚叉足電，回味返果啖"蒲撻"味道，心痕痕地，又走左去"新蒲撻"諗住睇下有無運行。今次大膽囉...最細投注額係二百，最大投注額一千二百！輸得最勁果次就係千二呢次。好喇...一千文本淨返二百，點呢...個莊咁旺，不如就過隔離枱痴下人地ｄ旺氣！哈，原來果邊個莊疲弱不堪，連爆八九舖，我仲中埋對子，五十變五百五十！興奮到叫出來！最後，翻本不特止，扣左本仲贏左二千七！哇哇哇...原來贏錢係咁Happy！成個人輕輕鬆鬆，招招積積咁！我都話啦，"蒲撻"好食！

哇...幾個月唔見，搞乜鬼我會變成咁...係咪想中我兩槌？

傻啦，我份人咁有原則，點會呀！ 係就係去...玩，係陪人玩。以上既內容，其實我係企在旁邊果位。不過真係幾刺激，賭枱上幾分鍾上落，變化難測。第一晚，無贏無輸，朋友話：我應該可以再贏"新蒲撻"一二千，我答：算啦，而家咪幾好...好似人生咁，空手來空手去，乜都唔會帶走！跟住兩個人對望傻笑...　原來第二日，先至係高潮所在，好似坐過出車咁，睇住ｄ籌碼又高又低咁，心情又上又落。好在，朋友手低眼高，以小博大，真係贏左"新蒲撻"二千幾。其實我由頭到尾雖然無玩，但金晴火眼睇到實，在適當時候就會"出手"！朋友當時一千輸淨二百，跟住連贏八九舖，贏到差ｄ忘形！當再輸返一次時，我立即出手......拉人，走！幾型，割禾青。如果唔係，邊會有二千七落袋呀，輸返轉頭都唔奇呀... 所以有我呢個人在，唔會有人變成爛賭鬼架！

賭場裡面，龍蛇混集！有斯斯縮縮一二百既師奶，又有一擲十幾廿萬既豪客，大家只有一個目標：贏錢！我身在其中，突然感到，我地做人總希望付出最少，得到最多，每日去爭去鬥，想最後贏既係自己！得到少少時，會認為自己可以有更多，因此繼續沉迷去追逐。如果在最忘形時，無一記當頭捧喝：喂，走喇！可能到最後會輸到一乾二淨。

放手啦，見好就收！好少人會識得幾時去做，包括我自己。